Fyrr í mánuðinum fannst lík 31 árs konu á botni Thun vatns í Sviss. Líkið var fest við 40 kílóa steypustykki. Enn hefur ekki verið skorið úr um dánarorsök konunnar en lögreglan rannsakar málið sem morð.

Lögreglan hefur ekki skýrt frá nafni konunnar en hefur birt mynd af steypustykkinu, húðflúri á konunni og lýst eftir vitnum. Bild og Blick eru meðal þeirra fjölmiðla sem hafa skýrt frá þessu.

Í upphafi var ekki vitað hver konan var en á bak hennar var húðflúrað nafn á þekktum plötusnúði, Gayle San sem var þekkt í Lundúnum á tíunda áratugnum. Einnig var húðflúr af uglu á baki hennar.

Sagan breiddist hratt út á samfélagsmiðlum og náði til Gayle San sem skrifaði um málið á Facebook vegna tengingar þess við nafn hennar. Hún vissi hins vegar ekkert um húðflúrið eða hver bar það á bakinu. Færsla hennar vakti mikla athygli og í kjölfarið bárust lögreglunni margar ábendingar og að lokum var hægt að bera kennsl á líkið. Það er af 31 árs plötusnúði sem dáðist mjög að Gayle San og taldi hana fyrirmynd sína.