Ferðamannaiðnaðurinn á í vök að verjast víða um heim og er hart barist um þá sem kjósa að leggja land undir fót og heimsækja önnur lönd. Þetta hefur leitt til nýrra aðferða til að lokka ferðamenn til ákveðinna landa.

Á Kýpur hafa yfirvöld til dæmis ákveðið að greiða fyrir uppihald ferðamanna ef þeir smitast af kórónuveirunni í fríinu sínu á eyjunni. CNN skýrir frá þessu. Munu ferðamenn sjálfir þurfa að standa straum af kostnaði við að komast út á flugvöll og heim en uppihaldið á eyjunni er ókeypis.

Í Úsbekistan hefur verið gripið til svipaðra ráða en þar er þó reiðufé í boði ef fólk greinist með kórónuveiruna þegar það heimsækir landið. Yfirvöld munu greiða þeim óheppnu sem nemur allt að 440.000 íslenskum krónum í bætur.

Í Genf er reynt að lokka ferðamenn til borgarinnar með því að bjóða upp á svokallaðan „Genfarpakka“ en með honum geta ferðamenn fengið mikinn afslátt af einkasiglingu með gistingu og útsýni til Mont Blanc eða einkakennslu hjá Michelin-kokki.

Í Danmörku gripu yfirvöld til þess ráðst að niðurgreiða aðgangseyri á söfn og dýragarða í sumarfríinu auk þess sem ókeypis er að sigla með ferjum, sem halda uppi áætlunarferðum til eyja landsins, í sumarfríinu.