Stefán Phillip Gíslaon sem situr í varðhaldi í Flórída, grunaður um að hafa orðið Dillon Shanks að bana, aðfaranótt mánudagsins síðastliðins, fæddist á Íslandi árið 1991 en fluttist með foreldrum sínum til Bandaríkjanna aðeins hálfs mánaðar gamall. Hefur hann búið alla ævi í Pensacola í Flórída. Hinn látni, Dillon Shanks, var 32 ára gamall.
Móðir Stefáns er fimmtug og faðir hans 55 ára og hefur fjölskyldan búið í Pensacola allar götur síðan árið 1991. Faðir Stefáns er hagfræðingur og háskólakennari.
Meirihluti stórfjölskyldunnar býr hins vegar á Íslandi. Ættingjar Stefáns hafa viljað láta hafa sáralítið eftir sér um málið en segja að það sé hræðilegt fyrir alla í fjölskyldunni og hafi komið öllum í opna skjöldu.
Fréttir sem hafðar eru eftir bandarískum fjölmiðlum þess efnis að Stefán hafi logið því að lögreglu að Dillon Shanks hafi framið sjálfsmorð koma fjölskyldunni á óvart. Samkvæmt þeirra upplýsingum hringdi Stefán í lögreglu skömmu eftir atvikið, á aðfaranótt mánudags, og tilkynnti um atvikið. Síðan hringdi hann í föður sinn.
Stefán hefur setið í gæsluvarðhaldi síðan á aðfaranótt mánudags. Fullvíst er talið að kunningskapur hafi verið milli hans og hins látna en ekki er vitað hve náin kynni þeirra voru.
Stefán hefur verið ákærður og fyrirtaka í máli hans verður þann 14. maí.
Stefán á nokkurn sakaferil að baki. Hann var handtekinn vegna líkamsárásar í nóvember árið 2018. Þá hefur hann verið ákærður fyrir ölvunarakstur, vopnaburð og fyrir að flýja af vettvangi umferðaróhapps. Í byrjun október í fyrra var Stefán handtekinn vegna skilorðsrofs.
