Á netinu eru engin takmörk fyrir þeim hatursáróðri og lygum sem er dreift. Sérstaklega ekki þessar vikurnar þegar COVID-19 heimsfaraldurinn heldur stórum hluta heimsins í greipum sínum. Að undanförnu hefur kórónufaraldurinn og meint tengsl hans við 5G farsímanetið verið heitasta umræðuefnið á netinu en nú er Bill Gates, stofnandi Microsoft, orðinn vinsælasta umræðuefni þeirra sem telja sig þurfa að dreifa lygum og áróðri.

Nú er dreift linnulausum lygum um að hann hafi látið búa COVID-19 til svo að hann gæti grætt á bóluefni gegn veirunni. Einnig ganga sögur um að hann sé meðlimur í hópi sem er að undirbúa að taka upp einhverskonar alheimsvöktunarkerfi þar sem fylgst verður með öllum jarðarbúum. New York Times skýrir frá þessu.

Gates er því orðinn vinsælla umræðuefni á netinu en 5G og kórónuveiran.

Frá því í febrúar hefur Bill Gates verið nefndur um 1,2 milljón sinnum á samfélagsmiðlum í tengslum við samsæriskenningar tengdar kórónuveirunni. New York Times fann 16.000 færslur, þar sem Gates kom við sögu, á Facebook sem 900.000 höfðu líkað við og tjáð sig um.

10 vinsælustu YouTube myndböndin, þar sem lygum um Gates og veiruna, er dreift hafa fengið um 5 milljónir áhorfa.

Gates ver í dag miklum tíma til allskonar mannúðarmála og notar stóran hluta af auðæfum sínum til margvíslegra góðverka á borð við baráttu gegn malaríu. Hann hefur gagnrýnt Donald Trump, Bandaríkjaforseta, og aðgerðir hans vegna COVID-19 og þá sérstaklega ákvörðun Trump um að hætta greiðslum til Alþjóðaheilbrigðisstofnunarinnar WHO.