Helga Hákonardóttir, öryrki og tveggja barna móðir, hefur glímt við fátækt síðastliðin tuttugu ár. Hún segir neyðina mikla á heimili sínu og ástandið hafa verið svo slæmt á einum tímapunkti að hún hafi sjálf ekki borðað annað en poppkorn til að börnin gætu borðað mat. Frá þessu var greint í kvöldfréttum Stöðvar 2.

„Ég hef verið í þeirri stöðu að eiga ekki hreinlega fyrir mat og hef passað upp á að ég ætti alltaf popp inni. Eina vikuna var þetta það eina sem ég borðaði“ segir Helga. „Ég hef líka verið í þeirri stöðu þar sem ég hef þurft að sleppa því að borga húsaleigu, til að geta borgað fyrir annað sem ég hef þurft á að halda, reyndar aðallega fyrir börnin.“

Að sögn Helgu ganga hlutir örlítið betur í ár en áður vegna þess að nú fær tímabundnar ummönnunarbætur vegna dóttur sinnar, sem á við fötlun að stríða. Telur hún þó ekki ólíklegt að hún lendi í sama fari aftur.

Helga segir hræðilegt að vera móðir í þessari stöðu. „Þegar ég á mikið fatlað barn sem er öryrki og mun vera það alla sína ævi og vita það stór hluti þjóðfélagsins horfir á hana og finnst bara allt í lagi að hún lifi við sárafátækt alla sína ævi,“ segir hún.

Rúmlega 120 manns hafa sótt um neyðarstyrk í sérstakan sárafátækarstjóð Rauða krossins síðan sjóðurinn var stofnaður í mars. Til að eiga rétt á styrkt úr sjóðnum er miðað við að einstaklingur fái ekki meira en 200 þúsund krónur fyrir skatt. Hver umsækjenda á rétt á tveimur úthlutunum úr sjóðnum á ári.

„Umsóknum fer rosalega fjölgandi og er mjög mikil neyð í samfélaginu,“ segir Hanna Ólafsdóttir, verkefnastjóri sjóðsins. „Það er húsnæðiskostnaður og leiga sem er að sliga fólk. Fólk sem er að fá jafnlítið og þetta á ekki efni á því að greiða fyrir neitt annað.“