Myndband þar sem skemmtikrafturinn og uppistandarinn Björn Bragi Arnarsson virðist vera að þukla á stúlku undir lögaldri er komið í dreifingu á samskiptamiðlum. Átti atvikið sér stað eftir skemmtun hjá KPMG á Akureyri, en Björn var veislustjóri þar. Hefur DV fengið ábendingar um að myndskeiðið sé tekið inni á Subway á Akureyri þar sem stúlkan var að bíða eftir afgeiðslu.

DV hefur aldrei áður fengið jafnmargar ábendingar um eitt og sama fréttaefnið. Eru samskiptamiðlar að fara á hliðina vegna myndbandsins. DV reyndi ítrekað að hafa samband við Björn Braga við vinnslu fréttarinnar en án árangurs. Svaraði hann hvorki síma né textaskilaboðum.

Stúlkan á myndbandinu er fædd árið 2001 og er 17 ára. Hún hefur tjáð sig stuttlega um málið á samskiptamiðlum. Ekki skal fullyrt að myndbandið sanni káf eða óviðeigandi hegðun Björns Braga. Þó bent hafi verið á að liturinn á jakkaerminni passi svo við jakkann þegar stúlkan snýr vélinni við, þá er ekki hægt að fullyrða að það sé Björn Bragi sem brjóti á stúlkunni né það sé stúlkan sem sést framan í á myndbandinu sem sé beitt kynferðislegri áreitni. Stúlkan á myndskeiðinu segir í lokaðri grúppu á Facebook að hún hafi tekið myndbandið upp. Hún sé fædd árið 2001 og myndbandið sé bókstaflega búið að fara út um allt. DV getur eins og áður segir staðfest það og líklegt að stór hluti þjóðarinnar hafi barið það augum nú þegar. Hefur stúlkunni verið sérstaklega hrósað fyrir að hafa tekið það upp, en Björn Bragi fær skammir. Eins og áður segir hefur Björn Bragi ekki svarað síma, smáskilaboðum eða skilaboðum á Facebook sem sáust á reikningi hans að hluta.

Björn Bragi er einn vinsælasti uppistandari og skemmtikraftur landsins. Hefur hann meðal annars gert garðinn frægan með grínhópnum Mið-Ísland. Eins og áður segir loga samfélagsmiðlar vegna myndbandsins og miklar umræður sem hafa átt sér stað á Twitter.