Þetta segir Fatih Birol, forstjóri Alþjóðaorkumálastofnunarinnar (IEA), í viðtali við Associated Press.
Birol segir að fyrstu merki skortsins gætu birst mjög fljótlega í evrópsku flugi.
„Brátt munum við heyra fréttir af því að sum flug frá borg A til borgar B verði felld niður vegna skorts á flugvélaeldsneyti,“ segir hann í viðtalinu.
Að hans sögn er um að ræða mestu orkukreppu sem heimurinn hefur nokkru sinni staðið frammi fyrir, sem rekja megi til þess að olíu-, gas- og aðrir lykilflutningar um Hormússund hafa nánast stöðvast.
Lokunin hefur þegar haft áhrif á heimsmarkaðsverð eins og komið hefur fram, en Birol segir að áhrifin muni þó dreifast misjafnlega. Þróunarlönd í Asíu, Afríku og Suður-Ameríku muni finna fyrst og verst fyrir áfallinu, en enginn verði undanskilinn.
„Ekkert ríki er ónæmt fyrir þessari kreppu,“ segir hann og bætir við að jafnvel auðugustu ríki heims muni finna fyrir verðbólgu, hægari hagvexti og auknum þrýstingi á samgöngur og orkukerfi.
Birol gagnrýndi jafnframt þá gjaldtöku sem írönsk stjórnvöld hafa komið á fyrir sum skip sem fá að fara um sundið. Hann segir hættulegt að slíkt fyrirkomulag festist í sessi, þar sem það gæti skapað fordæmi fyrir aðrar mikilvægar siglingaleiðir heims, þar á meðal Malakkasund í Asíu.
„Ef við breytum þessu einu sinni gæti reynst erfitt að snúa til baka,“ segir hann.
Að mati hans verður að tryggja að orkuflutningar geti farið skilyrðislaust frá A til B.
Samkvæmt Birol bíða nú meira en 110 olíuskip og yfir 15 skip með fljótandi jarðgas í Persaflóa eftir að komast út um Hormússund. Þau gætu vissulega létt varðandi yfirvofandi orkuskort ef þau kæmust leiðar sinnar, en hann segir það langt frá því að nægja.
Í frétt AP kemur fram að jafnvel þótt friðarsamkomulag náist á næstunni gæti tekið allt að tvö ár að ná framleiðslu aftur á sama stig og fyrir stríðið.
