„Það er ekki bara dýrt að vera með 31 borgarfulltrúa á launum, það er líka slæmir stjórnarhættir,” segir Róbert Ragnarsson, sem skipar 2. Sætið á lista Viðreisnar í Reykjavík fyrir komandi sveitarstjórnarkosningar, í aðsendri grein á Vísi í dag.

Þar gerir hann launakostnað borgarfulltrúa að umtalsefni og bendir á að Reykjavíkurborg sé eina höfuðborg Norðurlandanna þar sem allir borgarfulltrúar eru í 100% starfi hjá borginni.

„Meðallaun borgarfulltrúa eru um 1,7 milljónir króna á mánuði, og meðallaun varaborgarfulltrúa eru um 1,1 milljón króna á mánuði. Heildarkostnaður við 23 borgarfulltrúa og 8 varaborgarfulltrúa í Reykjavík er um 700 milljónir króna á ári. Þar af er kostnaður við föst laun varaborgarfulltrúa um 130 miljónir króna á ári, eða um hálfur milljarður á kjörtímabilinu. Það má hæglega lækka þennan kostnað,“ segir Róbert í grein sinni.

„Ég hef áður vakið athygli á þessu og Viðskiptaráð hefur núna tekið undir þá gagnrýni, en Samfylkingin ver það kerfi sem þau hafa skapað. Kerfi sem borgarbúar treysta ekki,“ bætir hann við.

Skilaði sér ekki í betri ákvörðunum

Róbert rifjar upp að árið 2018 hafi borgarfulltrúum fjölgað úr 15 í 23 þegar Alþingi breytti sveitarstjórnarlögum. Hann segir fátt benda til að þessi fjölgun hafi skilað sér í betri ákvarðanatöku fyrir borgarbúa.

„Þvert á móti er upplifun borgarbúa að stjórnsýsla hjá Reykjavíkurborg sé of flókin, ákvarðanir taki langan tíma og kostnaður sé of mikill. Traust til borgarstjórnar er um 13%.“

Róbert segir að það sé ekki bara dýrt að vera með 31 borgarfulltrúa á launum heldur sé einnig um slæma stjórnarhætti að ræða.

„Í hlutafélagi myndu eigendur aldrei samþykkja að öll stjórnin væri í fullu starfi því það veikir stöðu stjórnar varðandi eftirlit og ábyrgð. Það er gott að stjórnarfólk hafi önnur störf og séu í tengslum við atvinnulíf og samfélag. Hlutverk stjórna, hvort sem það er í hlutafélagi eða sveitarfélagi er að að setja stefnu, sinna eftirliti með rekstri og halda stjórnendum ábyrgum.“

Einföld breyting

Róbert segir að fulltrúar Viðreisnar vilji draga úr kostnaði við stjórnsýslu og færa peningana frekar í þjónustu við íbúana. Leggur hann til að sveitarstjórnarlögum verði breytt þannig að borgarstjórn Reykjavíkur geti fækkað borgarfulltrúum úr allt að 31 niður í 23.

Samkvæmt tillögunni yrði það gert með einfaldri breytingu á ákvæðum laganna um fjölda aðalmanna í sveitarstjórn. Með breytingunni yrði Reykjavík heimilað að ákveða fjölda borgarfulltrúa á bilinu 15 til 23, sem samkvæmt honum gæti sparað hundruð milljóna króna og skapað svigrúm til aukinnar þjónustu við borgarbúa.