Donald Trump, Bandaríkjaforseti, hefur verið harðlega gagnrýndur fyrir að deila rasísku myndbandi á síðu sinni á samfélagsmiðlinum, Truth Social. Um var að ræða eins mínútna langt myndband þar sem þeirri samsæriskenningu var haldið á lofti að demókratar hefðu „stolið“ forsetakosningunum árið 2020, sem er Trump verulega hugleikin.
Undir lok myndbandsins sjást síðan andlit Obama-hjónanna á gervigreindargerðum öpum í nokkrar sekúndur við undirleik lagsins „The Lion Sleeps Tonight“ með hljómsveitinni The Tokens.
Færslan hefur valdið mikilli reiði. The Guardian hefur tekið saman ýmis viðbrögð þekktra einstaklinga.
Ben Rhodes, fyrrverandi þjóðaröryggisráðgjafi Obama, brást til að mynda við færslunni með því að segja að Trump væri „blettur á sögu Bandaríkjanna“.
