Jón Ferdínand Estherarson fjölmiðlamaður greinir frá því í hinum vinsæla og fjölmenna Facebook-hópi Vertu á verði – Eftirlit með verðlagi að hann hafi fyrir skömmu farið í matvöruverslun og verðlagið hér á landi sé orðið slíkt að varla sé hægt að kaupa í heila matarkörfu heldur verði að láta sér nægja að kaupa fáeinar nauðsynjar í hvert sinn. Fyrir níu hluti greiddi Jón um 4.800 krónur og margir taka undir með honum að verðlag á matvöru sé allt of hátt á Íslandi.

Jón fór í eina af verslunum Bónus og segir svo frá:

„Maður kaupir ekki lengur matarkörfu á Íslandi, maður kaupir bara litla sorglega poka af fáeinum nauðsynjum. Eigendur matvöruverslana skila milljarða hagnaði á sama tíma.“

Jón keypti fyrir 4.800 krónur alls níu hluti. Kaffi frá Euroshopper, pakka að frosnum hindberjum frá sama vörumerki og sveskjupakka einnig frá Euroshopper, hálfs lítra skyrdollu, sjampó frá Neutral, einn pakka af rjómaosti, súrdeigsbrauð frá Pågen, einn pakka af tei og loks þrjá banana.

Eins og svo oft þegar verðlag á mat ber á góma á Íslandi þá er mikið rætt um færsluna í athugasemdum. Jóni er til að mynda bent á að versla frekar í Prís en Bónus en hann bendir á að verðmunurinn á flestum vörum, á milli fyrirtækjanna, sé lítill sem enginn. Aðrir benda á að Prís reki aðeins eina verslun og bæta verði þá ferðakostnaði ofan á til að reikna hinn raunverulega verðmun.

Flutningur

Einhverjir vilja meina að þar sem flestar vörurnar sem Jón keypti í umrætt sinn séu innfluttar verði að horfa til flutningskostnaðar en aðrir vilja meina að það sé ekki dýrt fyrir matvöruverslanir að flytja inn vörur með skipum frá Evrópu, til að mynda Hollandi þaðan sem mikið af ávöxtum og grænmeti er flutt inn til landsins. Aðrir sem  malda í móinn vilja meina að horfa verði til viðbótar á flutningskostnað innan Evrópu en ein helsta höfnin þaðan sem vörur eru fluttar eru til Íslands er í Rotterdam og ef vörur eru fluttar þangað frá Hollandi sjálfu, sem er ekki stórt land, og svo til Íslands má spyrja sig hvort einhver verulegur kostnaður eigi að bætast við kostnaðinn af því að sigla með vörunar hingað til lands.

Í mörgum athugasemdum er kvartað almennt yfir háu verðlagi á Íslandi en í einni athugasemd er velt upp afleiðingum hins háa verðlags:

„Sorglegt og maður finnur mikið fyrir þessu. Svo klóra stjórnvöld sér hissa á kollinum á því að fæðingartíðni hér fer minnkandi.“

Margir kalla í athugasemdum eftir því að erlendar lágvöruverðsverslanakeðjur komi til landsins en hvort þær séu tilbúnar til þess í ljósi smæðar markaðarins og íslensku krónunnar er efni í sérstaka unræðu sem verður ekki farið út í hér.