Þrjár manneskjur frá Kólumbíu hafa verið ákærðar fyrir stórfellt fíkniefnabrot sem framið var fimmtudaginn 19. febrúar 2026. Um er að ræða tvo karlmenn, annan fæddan 1990 og hinn 2001, og eina konu, sem er fædd árið 2000.
Þeim er gefið að sök að hafa staðið að innflutningi á 2.370 ml af kókaíni á vökvaformi, með rösklega 50% styrkleika, ætluðu til söludreifingar hér á landi í ágóðaskyni.
Fíkniefnin fluttu ákærðu innvortis til Íslands sem farþegar með flugi TO7478 frá París í Frakklandi til Keflavíkurflugvallar. Voru þau hvert og eitt með frá 15 og upp í 33 pakkningar af efnunum innvortis.
Krafist er refsingar yfir fólkinu og auk þess upptöku á kókaínvökvanum og þremur símum þeirra sem voru haldlagðir við rannsókn málsins.
Málið er til meðferðar við Héraðsdóm Reykjaness.
