Árni Stefán Árnason lögfræðingur hefur átt í töluverðum útistöðum við Matvælastofnun (MAST) vegna dýrahalds í sumarhúsabyggð í Kjósinni. Árni Stefán hefur haldið þar dýr sem nágrannar hans saka hann um að vanrækja og hafa þeir þráfaldlega tilkynnt meinta vanrækslu hans á dýrunum til stofnunarinnar, sem hefur brugðist við með haldlagningu.
Samtals fimm hundar, fyrst fjórir og síðan einn, voru teknir í vörslu MAST fyrr í vor. DV hefur greint nokkuð frá þessum málum, sjá meðal annars hér:
Nýlega tjáðu nágrannarnir MAST áhyggjur sína af dúfum sem þeir sögðu Árna geymar læstar og vatnslausar í dúfnakofa, þarna í Kjósinni. MAST greip til aðgerða og naut aðstoðar lögreglu. Fékk Árni eftirfarandi tilkynningu frá lögfræðingi MAST, Einari Erni Thorlacius, vegna aðgerðarinnar:
„Sæll Árni Stefán.
Matvælastofnun barst í gærmorgun ábending um að dúfur væru innilokaðar í dúfnakofa þínum í Kjósinni vatnslausar og læstar inni.
Farið var samdægurs í lögreglufylgd á staðinn. Í ljós kom að dúfnakofinn var ólæstur en þar þar reyndist vera inni ein dúfa án vatns.
Hún var tekin í vörslu Matvælastofnunar og tilkynnist það hér með.“
Árni fer hæðnisfullum orðum um aðgerðina í færslu á Facebook. Má á honum skilja að lögreglufylgd hafi verið fyllilega óþörf og frekar hefði átt að sleppa dúfunni en leggja hald á hana:
„Grínið og vönduð stjórnsýsla heldur áfram af MAST. Fyrir tveim dögum taldi ég mig hafa tekið allar dúfur úr Kjós. Dúfur geta skv. fremstu dúfnaræktendum á Íslandi verið vatnslausar í allt að 7 daga. Hugðist fara í Kjós í dag til að tryggja að dúfur sem hefði máske ei skilað sér væru komnar að kofanum. Þá berast mér þessi skilaboð. Vel gert Einar og í lögreglufylgd. Þetta er stjórnsýsla og framfylgd laga um velferð dýra í hæsta gæðaflokki:) – Dúfunni hefði verið kærara að henni væri veittur drykkur og henni sleppt, svo mikið er víst. – Er lögreglan að gera sig að athlægi?“
