Kristrún Frostadóttir fékk óvenjulega gjöf frá Narendra Modi, forsætisráðherra Indlands, á fundi þeirra í Osló. Fékk hún forláta ísöxi, endurgerð af öxi Tenzing Norgay sem kleif Everest fjall fyrstur manna ásamt Edmund Hillary.

Kristrún og aðrir leiðtogar Norðurlandanna funduðu með Modi þann 19. maí. Ræddi hún samstarf og viðskipti á ýmsum sviðum við indverska forsætisráðherrann, svo sem orkumál, sjávarútveg, jarðvarma og kolefnisförgun.

Modi kom með gjafir til norrænu ráðamannanna. Meðal annars fékk Petteri Orpo, forsætisráðherra Finnlands, málverk, og Mette Fredriksen, forsætisráðherra Danmerkur, vasa.

Kristrún fékk ísöxi í kassa, uppstilltri með myndum af Tenzing Norgay og upplýsingum um afrek hans. Öxin er endurgerð af þeirri sem Sjérpinn Norgay notaði í leiðangrinum fræga með hinum nýsjálenska Edmund Hillary árið 1953, þegar þeir klifu fyrstir manna hæsta tind veraldar, Everest.

Segir að gjöfin sé vel við hæfi fyrir Ísland, sem sé nátengt hrjóstrugri náttúru, jöklum og ævintýramennsku. Ísöxin er einfalt verkfæri, úr stáli og timbri, sem hentar vel til fjallamennsku. Hún er tákn fyrir úthald, virðingu fyrir náttúrunni og landkönnunarandanum sem einkenni bæði Himalayja fjöll og Norðurlöndin.