Dómur var kveðinn upp kl. 11:30, í Héraðsdómi Suðurlands, í Gufunesmálinu svokallaða. Í málinu voru fimm ákærð í tengslum við andlát Hjörleifs Hauks Guðmundssonar, 65 ára manns frá Þorlákshöfn, sem lést þann 11. mars í kjölfar mikilla misþyrminga.

Þeir Stefán Blackburn, Lúkas Geir Ingvarsson og Matthías Björn Erlingsson voru allir ákærðir fyrir manndráp, frelsissviptingu, rán og tilraun til fjárkúgunar.

Kona um tvítugt var ákærð fyrir hlutdeild í frelsissviptingu og ráni með því að hafa sett sig í samband við Hjörleif símleiðis og lokkað hann út í bíl til Stefáns og Lúkasar.

Maður um tvítugt var ákærður fyrir peningaþvætti með því að hafa tekið við greiðslu úr einkabanka Hjörleifs og lagt inn á reikning Matthísar Björns.

Þeir Stefán Blackburn og Lúkas Geir hlutu 17 ára fangelsi en Matthías Björn 14 ára fangelsi. 

Piltur sem ákærður var fyrir peningaþvætti í málinu fékk tveggja ára skilorðsbundið fangelsi.

Stúlka, sem ákærð var fyrir hlutdeild í ráni og frelsissviptingu með því að setja sig í samband við Hjörleif heitinn og vísa honum út í bíl til Stefáns og Lúkasar, var sýknuð.

Þrír aðalsakborningarnir eru síðan dæmdir til að greiða aðstandendum Hjörleifs, ekkju og syni, um 18 milljónir króna í miskabætur, rúmlega 11 milljónir til ekkjunnar og rúmlega sex milljónir til sonarins.