Landsréttur hefur fellt úr gildi gæsluvarðhaldsúrskurð yfir manni sem stal bíl þann 20. júlí sl. og ók inn á haftasvæði Keflavíkurflugvallar. Greint var frá atvikinu í fréttum degi síðar en þar kom fram að maðurinn hefði ógnað flugumferð en hann ók meðal annars inn á flugbraut þar sem flugvél var að undirbúa flugtak.
Landsréttur tók fram að viðkomandi eigi sögu um andleg veikindi og vímuefnaneyslu. Matsmaður hafi verið dómkvaddur til að framkvæma geðrannsókn en matsgerð liggur enn ekki fyrir. Því liggi hvorki fyrir gögn um geðhagi mannsins né áhættumat lögreglu. Þar sem ákæruvaldið fór fram á gæsluvarðhald á grundvelli þess að telja mætti það nauðsynlegt til að verja aðra fyrir árásum sakbornings, væru skilyrði ekki uppfyllt.
Í úrskurði Héraðsdóms Reykjaness kom fram að maðurinn hafi stolið bifreið við flugturn Flugstöðvar Leifs Eiríkssonar þann 20. júlí og ekið henni inn á flughaftarsvæði. Bifreiðinni var ekið yfir flugbrautir í notkun og svo út af haftasvæðinu í gegnum svokallað gullna hliðið, út af ítrasta haftarsvæði flugverndar.
Mun maðurinn hafa farið yfir girðingu á ítrasta haftarsvæðinu, gengið um það og flughlað og tekið þar bifreiðina ófrjálsri hendi. Hann ók á miklum hraða um flugbrautir og í kringum flugvélar og olli þar með mikilli hættu fyrir öryggi samgangna, flug- og umferðaröryggi og öryggi almennings þar til hann ók út af haftarsvæðinu og út í almenna umferð. Eins reyndi maðurinn að komast inn í kyrrstæða flugvél sem stóð á flughlaði.
Lögregla veitti manninum eftirför á ofsahraða á Reykjanesbrautinni. Sýndi hraðamælir lögreglubifreiðar 189 km/klst á einum tímapunkti og var þá enn talsvert bil milli mannsins og lögreglu. Loks hægri maðurinn ferð sína þegar hann nálgaðist miðlæg gatnamót Reykjanesbrautar og Grindavíkurvegar og stöðvaði svo bifreiðina. Var maðurinn þá handtekinn og var sjáanlega undir áhrifum fíkniefna, mjög þurr í munni og sjáöldur samandregin. Við öryggisleit fannst smelluláspoki með óþekktu hvítu efni sem lögregla telur hafa verið kókaín. Eins reyndist maðurinn hafa um hálsinn reipi.
