Gæsluvarðhald hefur verið framlengt yfir franskri konu sem grunuð er um að hafa orðið eiginmanni sínum og dóttur að bana á Edition-hótelinu í Reykjavík þann 14. júní. sl. Var gæsluvarðhaldið framlengt um fjórar vikur, eða til 31. júlí, vegna rannsóknarhagsmuna

Rannsókn málsins er afar flókin og teygir sig út fyrir landsteinana. Konan er frönsk en foreldrar hennar eru asískir. Eiginmaður hennar kom frá Nýju-Kaledóníu, eyjaklasa sem tilheyrir Frakklandi, en fjölskyldan hafði verið búsett á Írlandi frá árinu 2017.

RÚV greindi frá því í gær að við upphaf ferðar fjölskyldunnar til Íslands hafi þau sent fjölskyldu mannsins þrjár erfðaskrár sem varða eignir upp á rúman milljarð íslenskra króna. Fjölskyldan hafði dvalið hér í eina viku á tveimur herbergjum á einu dýrasta hóteli landsins, Edition. Þar kostar nóttin rúmlega 150 þúsund krónur.

Konan hefur neitað sök í málinu.