Hallgrímskirkja á Skólavörðuholti hefur verið valin önnur fallegasta bygging í heimi af blaðamanni Time Out.

Listinn inniheldur 24 byggingar sem að mati blaðamanns eru þær fallegustu í heimi. „Frá verkfræðilegri snilld nýstárlegra bygginga til nokkurra elstu mannvirkja jarðarinnar, hér má finna ótrúlegustu byggingar jarðarinnar.“

Á toppi listans er leghöllin Taj Mahal í Agra á Indlandi sem Mógúlkeisarinn Shah Jahan lét byggja í minningu um persneska eiginkonu sína, Mumtaz Mahal. Höllin var 23 ár í byggingu, frá 1630 – 1653, og er meistaraverk mógúlskrar byggingarlistar.

Hallgrímskirkja tilheyrir hinni evangelísku-lúthersku þjóðkirkju og er stærsta kirkja landsins, turn hennar er 73 metra hár. Kirkjan er nefnd eftir Hallgrími Péturssyni presti og sálmaskáldi (1614-1674). Guðjón Samúelsson, húsameistari ríkisins, hófst handa við að teikna kirkjuna árið 1937 og bygging hennar hófst árið 1945. Kirkjan var vígð 26. október 1986, daginn fyrir 312. ártíð Hallgríms Péturssonar, sama ár og Reykjavík hélt upp á 200 ára afmæli sitt.

„Hallgrímskirkja í Reykjavík gæti litið út eins og eldflaug, en hún er í raun áberandi evangelísk-lútersk kirkja og stærsti tilbeiðslustaður á Íslandi. Framhlið hennar minnir á bæði nútímalega og expressjóníska byggingarstíla, en Guðjón Samúelsson, aðalhönnuður byggingarinnar, sótti innblástur í hið óbyggða landslag landsins. Hallandi hliðar Hallgrímskirkju minna á kælt hraun og hvíta steypuáferðin gerir henni kleift að falla vel að fjallabakgrunninum.“

Aðrar byggingar á listanum eru meðal annars pýramídarnir í Giza í Egyptalandi, AD-Deir minnismerkið í Petru í Jórdaníu, La Sagrada Familia kirkjan í Barcelona á Spáni, Maggie’s Centre, St James’s Hospital í Bretlandi og Pantheon í Róm á Ítalíu.