Þorgerður Kristín Þráinsdóttir hefur verið skipuð í embætti forstjóra ÁTVR af Daða Má Kristóferssyni, fjármála- og efnahagsráðherra.
Þetta kemur fram í tilkynningu Stjórnarráðsins.
„Þorgerður var valin úr hópi umsækjenda um stöðuna, sem auglýst var í apríl síðastliðnum. Hún býr yfir víðtækri reynslu af stjórnunarstörfum á smásölumarkaði og hefur frá árinu 2014 gegnt starfi framkvæmdastjóra Fríhafnarinnar. Áður starfaði hún í yfir áratug hjá Lyfju hf., sem forstöðumaður verslana- og markaðssviðs og mannauðsstjóri,“ segir í tilkynningu.
Þorgerður er með gráðu í sálfræði með áherslu á vinnu- og skipulagssálfræði. Einnig hefur hún lokið PMD stjórnendanámi.
Þorgerður er skipuð til fimm ára frá 1. september næstkomandi.
