Í Harkinu, hlaðvarpi á Fótbolta.net, er því haldið fram að Jón Daði Böðvarsson hafi neitað að mæta í viðtal eftir að hann sneri aftur á völlinn um helgina.

Jón Daði, sem sneri heim á Selfoss í fyrra, hafði ekki komið við sögu í tveimur leikjum fram að sigrinum gegn Fjölni um helgina. Fréttir herma að fyrrum landsliðsmaðurinn hafi verið sendur heim af æfingu, það hafi verið ástæða þeirrar fjarveru.

„Miðað við hvað maður hefur heyrt um hvað hafi gerst þá finnst mér furðulegt að hann sé kominn aftur og hafi fengið bandið. Síðan reyndi Fótbolti.net að fá hann í viðtal eftir leik en hann sagði bara nei, sem er líka skrítið, miðað við hversu vel Selfyssingar hafa höndlað öll sín mál hingað til.

Maður hefði búist við því að hann hefði mætt, sagt þetta mál vera að baki og áfram gakk,“ kemur meðal annars fram í Harkinu.

Óli Stefán Flóventsson veitti Fótbolta.net hins vegar viðtal eftir leik og sagði málinu lokið, auk þess sem hann hrósaði Jóni Daða.