Javier Hernandez hefur í opinskáu viðtali rifjað upp erfiðan tíma í einkalífi sínu sem átti stóran þátt í niðursveiflu á síðari hluta ferilsins.

Hernandez, betur þekktur sem Chicharito, varð gríðarlega vinsæll hjá Manchester United eftir komuna frá Guadalajara árið 2010 og vann meðal annars tvo Englandsmeistaratitla með liðinu .

Sóknarmaðurinn viðurkenndi þó síðar að hann hefði átt erfitt utan vallar eftir skilnaðinn við fyrirsætuna Sarah Kohan árið 2021.

„Ég brást sem eiginmaður, faðir og manneskja. Ég var ekki sá pabbi sem ég vildi vera,“ sagði Hernandez.

Hann greindi einnig frá því að hann hefði glímt við þunglyndi á þessum tíma, sérstaklega eftir andlát afa síns Tomas Balcazar.

„Ég missti áhugann á öllu. Ég grét einn á æfingum á meðan Covid stóð yfir,“ sagði Mexíkóinn.

Hernandez sagði að hann hefði jafnvel hugleitt að hætta í fótbolta á þessum tíma.

Ferill hans dalaði á síðustu árum með stoppum hjá LA Galaxy og Guadalajara, en hann var síðar gagnrýndur harðlega í heimalandinu fyrir ummæli um konur á samfélagsmiðlum.

Forseti Mexíkó, Claudia Sheinbaum, sagði meðal annars að Hernandez ætti margt ólært þegar kæmi að jafnréttismálum.

Chicharito baðst síðar afsökunar á ummælunum og sagði þau aldrei hafa átt að særa eða niðurlægja fólk.