Manchester United er farið að skoða möguleika á að endurfjármagna stóran hluta skulda félagsins sem fellur í gjalddaga á næsta ári.

Samkvæmt heimildum er félagið í viðræðum við banka um mögulega lausn vegna skulda upp á 425 milljónir dala, sem samsvarar rúmlega 58 milljörðum íslenskra króna.

Viðræðurnar eru þó enn á frumstigi og hefur United ekki tekið endanlega ákvörðun um hvernig staðið verður að endurfjármögnuninni. Félagið er meðal annars sagt skoða svokallaðan einkafjármögnunarmarkað til að tryggja hagstæðari kjör.

Málið kemur upp á sama tíma og áfram er óvissa um framtíð eignarhalds félagsins. Meðlimir Glazer-fjölskyldunnar, sem hafa verið eigendur Manchester United í tvo áratugi, eru sagðir áfram skoða ýmsa möguleika varðandi fjárhagslega uppbyggingu félagsins.

Skuldastaða United hefur lengi verið mikið umræðuefni meðal stuðningsmanna, sem hafa gagnrýnt Glazer-fjölskylduna fyrir að leggja miklar skuldir á félagið.

Forráðamenn United vonast til að finna lausn sem styrki fjárhagsstöðu félagsins án þess að hafa neikvæð áhrif á starfsemi þess eða möguleika á félagaskiptamarkaðnum.