Skrifstofa forsetans fyrrverandi greindi frá því í gær að hann hefði greinst „agressíft“ mein í blöðruhálskirtli og meinvörp í beinum. Biden mun hafa farið til læknis í síðustu viku vegna einkenna frá þvagfærum og fundu læknar þá hnúð á blöðruhálskirtlinum.
Í fréttum bandarískra fjölmiðla kom fram að meinið hefði fengið einkunnina 9 á hinum svokallaða Gleason-kvarða sem notaður er til að meta hversu árásargjarnt krabbamein í blöðruhálskirtli er.
Mail Online hefur eftir Dr. Howie Forman, prófessor við Yale-háskóla, að niðurstöður PSA-mælingar (e. Prostate Specific Antigen) gefi til kynna að Biden hefði verið með krabbameinið „í einhvern tíma áður en það greindist“ miðað við það hversu árásargjörn tegundin er.
Segir hann það undarlegt að sjúkdómurinn væri að greinast fyrst á þessu stigi – sérstaklega í ljósi þess að Biden hefur haft fyrsta flokks aðgang að heilbrigðisþjónustu á síðustu árum.
Dr. Marc Siegel, sem fréttastofa Fox ræddi við, segir það einnig undarlegt að meinið hafi fyrst uppgötvast með þreifingu á blöðruhálskirtli. „Yfirleitt sjáum við hækkað PSA-gildi og eltum það svo uppi,“ segir hann og bætir við að hann skoði alla sína sjúklinga, sem komnir eru yfir 45 ára aldur, með tilliti til sjúkdómsins.
Bendir hann á að í tilfelli Bidens hafi læknar fyrst gert sýnatöku eftir að hann kvartaði yfir þvagvandamálum og það sé merki um að meinið hafi þegar breiðst út. Siegel segir að einkenni sjúkdómsins séu oft lítil sem engin í byrjun.
„En hann hlýtur að hafa fengið þá bestu umönnun sem völ er á. Ég er dálítið hissa á að þetta sé svona langt gengið,“ segir hann. „Það væri mjög ótrúlegt ef þeir hefðu ekki fylgst náið með þessu því læknar vita að þetta er sú tegund krabbameins sem virkilega þarf að leita eftir hjá körlum.“
