Hann kom nýlega í hlaðvarpið The Ranveer Show og ræddi um hvort vitsmunaverur séu til utan jarðarinnar. Hann sagði engan vafa leika á því að líf sé að finna á öðrum plánetum. „Hugur minn segir já þrátt fyrir að ég hafi engar sannanir. Ég segi þér þetta sem forstjóri geimferðastofnunarinnar ISRO,“ sagði hann.
„Það eru örugglega geimverur þarna úti í alheiminum. Geimverur þýðir að það eru lifandi kerfi og samfélög í öðrum hlutum alheimsins. Ef þær eru nokkur þúsund árum, eða jafnvel 10.000 árum, á undan okkur á tæknisviðinu, þá munu þær örugglega heimsækja okkur,“ sagði hann.
Hann líkti þessu við manneskjur sem fara í dýragarð til að sjá ljón. „Fyrir þær er plánetan okkar eins og dýragarður,“ sagði hann.
Hann er þó ekki spenntur fyrir að hitta geimverur, að minnsta kosti ekki vitsmunaverur, á næstunni. Hann sagði að líffræðin sé þannig að öll lífsform á jörðinni tengist á einhvern hátt, plöntur, bakteríur, fiskar, dýr og fólk. „Við þróuðumst öll frá sama forföðurnum,“ sagði hann og bætti við: „Ef eitthvað þróast á annarri plánetu, þá gæti það hafa þróast á allt annan hátt. Það er hugsanlega ekki með sömu genauppbygginguna eða prótín uppbyggingu og það getur verið mjög hættulegt. Þegar tvö lífsform hittast, þá verður annað að drottna yfir honum. Það er gangur náttúrunnar, annað mun ekki leyfa hinu að lifa, það verður að standa framar og eyða hinu.“
