Það hljómar kannski ekki spennandi að borða hafragraut daglega en það þarf ekki að vera svo slæmt eða óspennandi. Leah Wynalek ákvað fyrir nokkrum árum að prufa að borða hafgraut í morgunmat á hverjum degi í heilan mánuð. Óhætt er að segja að áhrifin af því hafi verið jákvæð.

Fjallað er um þetta á vef Prevention. Fram kemur að Leah hafi, eins og margir aðrir, vitað að nauðsynlegt sé að halda blóðsykurmagni líkamans í jafnvægi til að forðast að löngun vakni í sælgæti og bita á milli mála en þeir eiga það oft til að vera ekki svo hollir. Leah ákvað einmitt að gera hafragrautstilraunina til að reyna að koma í veg fyrir að slíkar langanir kviknuðu.

Henni fannst þó ansi óspennandi tilhugsun að borða hafgraut á hverjum morgni í heilan mánuð en lét sig samt hafa það.  Hún segir að hafgrautsneyslan hafi fljótlega haft mjög jákvæð áhrif á hana. Það varð auðvelt að sleppa því að fá sér nasl á milli morgunverðarins og hádegisverðarins. Blóðsykurinn var í góðu jafnvægi og hún fann ekki fyrir löngun í allt mögulegt yfir daginn.

Það komst fljótt upp í vana hjá henni að borða hafragraut í morgunmat og var alls ekki leiðinlegt eins og hún hafði eiginlega átt von á. Það þarf því ekki að koma á óvart að hún hélt áfram að borða hafragraut í morgunmat að mánuðinum loknum.