Í nýrri rannsókn kemur fram að það besta fyrir heilbrigða þarmaflóru sé að mataræðið sé fjölbreytt. Fram kemur að þeim mun meira af matvælum, úr plönturíkinu, sem eru borðuð, þeim mun fleiri gagnlegar bakteríur þrífist í þörmunum. Skiptir þá engu hvort þú ert grænmetisæta eða kjötæta.

Vísindamennirnir rannsökuðu matarvenjur rúmlega 21.000 manns í Bandaríkjunum, Bretlandi og á Ítalíu.

Þeir notuðust við DNA-greiningar á saursýnum og sýndu þessar greiningar greinileg tengsl.

Mataræðið, sem inniheldur mikið af ávöxtum, grænmeti og grófu korni, reyndist gott fyrir þarmaflóruna því mikið af „góðum“ þarmabakteríum, sem geta lækkað blóðþrýstinginn og blóðfituna og dregið úr bólgum, fylgdu þessu mataræði.

Grænmetisætur voru með mest af þessum bakteríum en fólk, sem borðið reglulega rautt kjöt, var með hærra hlutfall af bakteríum sem hafa verið tengdar við bólgur í þörmum og ristilkrabbamein.

En kjötætur, sem borðuðu einnig mikið af grænmeti, reyndust vera með heilbrigða þarmaflóru. Það bendir til að heilbrigðu bakteríurnar úr plöntum geti unnið á móti neikvæðum áhrifum kjöts.

Til að fá heilbrigða þarmaflóru þarf ekki að hætta að borða kjöt en það þarf að borða fjölbreytta fæðu.

Borðaðu minnst 30 mismunandi matvörur úr plönturíkinu í hverri viku.

Skiptu á milli mismunandi grænmetis, ávaxta og kornvara.

Takmarkaðu neyslu á rauðu kjöti og unnum kjötvörum.

Borðaðu gerjaðar matvörur á borð við jógúrt og súrkál til að bæta þarmaflóruna enn frekar.