Steingervingurinn, sem fannst í norðurhluta Venesúela, er sjaldgæft dæmi um dýr sem var veitt af tveimur mismunandi rándýrum fyrir 23 til 11,6 milljónum ára. Steingervingar geta sýnt hvort dýr hafi verið étið af öðru dýri en oft er erfitt að sjá hvort það var rándýr sem át það er hrææta.
Live Science segir að í tilkynningu frá háskólanum í Zurich sé haft eftir Aldo Benites-Palomino, aðalhöfundi rannsóknarinnar, að uppgötvunin sé ein örfárra sem sýni að fleiri en ein tegund rándýra hafi ráðist á sömu bráðina og að þetta veiti innsýn í hvernig fæðukeðjan var á þessum tíma.
Í rannsókninni, sem hefur verið birt í vísindaritinu Journal of Vertebrate Paleontology, kemur fram að sækýrin hafi verið með djúp tannaför á trýninu. Það bendir að mati vísindamannanna til að krókódíll hafi fyrst ráðist á hana og bitið hana í trýnið til að reyna að kæfa hana. Aðrir áverkar sýna að krókódíllinn hafi dregið kúna og snúið sér dauðahringinn með hana, svipað og krókódílar nútímans gera.
Vísindamennirnir fundu einnig tönn úr tígrishákarli í hnakka kýrinnar og sáu bitför hákarls víða á beinagrindinni. Tígrishákarlar eru stundum sagðir vera „ruslatunna sjávarins“ því tígrishákarlar nútímans eru latir til veiða og leita oft að bráð sem búið er að drepa eða dýrum sem hafa drepist af náttúrulegum orsökum. Þeir virðast einnig hafa gert þetta fyrir milljónum ára.
