Þessi risaapategund kom fram á sjónarsviðið fyrir um tveimur milljónum ára en dó út fyrir 215.000 til 295.000 árum síðan. Hún hefur lengi verið uppspretta heilabrota hjá vísindamönnum sem hafa ekki getað fundið skýringuna á af hverju tegundin hvarf af sjónarsviðinu.
En í nýrri rannsókn kemur fram hugsanleg ástæða þess að tegundin dó út. Niðurstaðan er að það hafi verið loftslagsbreytingar sem gerðu út af við hana.
Þetta kemur fram í fréttatilkynningu frá Chinese Academy of Science.
Það hefur lengi valdið heilabrotum að tegundin dó út á sama tíma og aðrar tegundir prímata löguðu sig að breyttum aðstæðum og héldu velli. En samkvæmt niðurstöðu kínversku vísindamannanna þá voru það loftslagsbreytingar, sem hófust fyrir 700.000 árum, sem skiptu sköpum varðandi það að tegundin dó út. Þetta byggja vísindamennirnir á rannsóknum á steingervingum og jarðlögum úr 22 hellum í suðurhluta Kína.
Rannsóknin leiddi í ljós að loftslagið og plönturnar á svæðinu voru mjög háðar loftslaginu vegna loftslagsbreytinganna. Þær höfðu í för með sér að margir skógar í suðurhluta Kína breyttust í graslendi og þurrkatímabilum fjölgaði.
Rannsóknin hefur verið birt í vísindaritinu Nature. Í henni kemur fram að þar sem aparnir átu mikið af ávöxtum hafi þeir lent í vanda vegna loftslagsbreytinganna. Þegar enga ávexti var að hafa byrjuðu þeir að éta trjábörk.
Höfundar rannsóknarinnar segja að svo virðist sem aparnir hafi valið þróunarlega leið sem hafi gert að verkum að tegundin dó út.
