Hin 35 ára gamla Nikita Hand höfðaði einkamál gegn McGregor og bar hann þeim sökum að hafa nauðgað og gengið í skrokk á sér á hóteli í Dublin fyrir sex árum. Var Conor dæmdur til að greiða konunni sem nemur rúmum 35 milljónum króna.
Devlin lét í sér heyra á Instagram í gær þar sem hún tjáði sig um málið og sakaði raunar Nikitu um að hafa McGregor fyrir rangri sök. „Synir mínir verða varaðir við því að konur eins og þú eru til í þessum heimi,“ sagði hún.
Í færslu sinni sagði Devlin að Nikita væri „djammstelpa“ sem hefði sent McGregor djarfar ljósmyndir. „Ímyndaðu þér að vera kona, með eigin kærasta og barn, að senda djarfar myndir af sér til manns sem á fjölskyldu og með barn á leiðinni.“
Devlin sagði þar að auki að Nikita hefði vanrækt eigin börn og farið á fyllerí sem stóð yfir í nokkra daga. „Hvers konar KONA ertu?“
Devlin segist standa við bakið á sínum manni.
„Ég og minn maður höfum skapað okkur fallegt líf saman. Ég elska hann, treysti honum og TRÚI HONUM!,“ sagði hún meðal annars.
