Um hádegisbil á sunnudaginn sást til ferða karlmanns í Accra dýragarðinum í Gana eftir að honum hafði tekist að komast yfir öryggisgirðinguna sem umlykur dýragarðinn. Hann fór síðan inn yfir girðinguna, sem umlykur ljónasvæðið, og reyndi að stela ljónsunga að því að talið er.

Þetta endaði með skelfingu því ljónin réðust á hann og drápu og átu. Joy Online skýrir frá þessu.

Talið er að maðurinn hafi verið um þrítugt en enn á eftir að staðfesta það og bera kennsl á hann sem og komast að því af fullri vissu af hverju hann fór inn á svæði ljónanna.

Lögreglan vinnur nú að rannsókn málsins.

Stjórnendur dýragarðsins segja að ekkert ami að ljónunum og þau séu örugg í dýragarðinum.