Ladbible skýrir frá þessu. Fram kemur að þetta þýði að Curries hafi innbyrt átta tonn af sykri en það svarar til sjö milljóna sykurmola.
„Ég hef alltaf elskað bragðið af köldu Pepsi. Ekkert er betra og ég varð bara háður því,“ sagði hann eitt sinn og útskýrði síðan af hverju hann drakk sykraðan gosdrykk í svo miklu magni: „Ég vinn á nóttunni og mér hefur alltaf líkað vel við „sykurvímuna“ sem heldur mér gangandi. Ég drekk fjórar eða fimm tveggja lítra flöskur af Pepsí á dag. Af því að ég vinn í Tesco get ég bara keypt það strax eftir vinnu og tekið með heim.“
Hann sagði einnig að þetta hafi kostað hann háar upphæðir, bílverð á hverju ári.
Hann sagðist hafa verið háður Pepsi og fundist hann þurfa að drekka Pepsi um leið og hann vaknaði. „Ég varð bara að fá það. Um leið og ég vaknaði gekk ég að ísskápnum og helti Pepsi í stórt glas,“ sagði hann.
Hann greindist með sykursýki fyrir nokkrum árum en hélt samt sem áður áfram að drekka Pepsi.
Það var ekki fyrr en hann fékk aðstoð David Kulmurry, þerapista og dáleiðara, sem hann gat hætt. „Ég fundaði með David á netinu og hann dáleiddi mig í um 40 mínútur. Ég veit ekki hvað hann sagði en eftir það hef ég ekki haft lyst á Pepsi,“ sagði Curries.