Lögreglan í London hefur handtekið þrettán ára dreng sem er grunaður um að hafa stungið mann á fimmtugsaldri til bana aðfaranótt 4. janúar síðastliðinn í Yiewsley, West Drayton. Gera breskir fjölmiðlar nokkuð úr því að um hafi verið að ræða fyrsta morð ársins í höfuðborginni.

Sá látni hét Dariusz Wolosz og var 46 ára gamall, ættaður frá Póllandi. Lögreglan fékk tilkynningu um mann sem hafði orðið fyrir stunguárás rétt eftir miðnætti 4.janúar. Tæpum hálftíma síðar var Woloz úrskurðaður látinn og var úrskurðað um að dánarorsök hafi verið vegna stungusárs í brjóstkassa og nára.

„Við teljum að Wolosz hafi orðið fyrir árás hóps manna í kjölfar rifrildis. Hópurinnn hafi svo tvístrast eftir árásina,“ segir í yfirlýsingu lögreglu. Þá kemur fram að fjölskylda Woloz sé harmi sleginn vegna atvikins og allt verði reynt til að styðja þau á erfiðum tímum. Talsverð umferð var á því svæði sem árásin bannvæna átti sér stað og óskaði lögregla eftir aðstoð vegfarenda og hvort að sá möguleiki væri fyrir hendi að mælaborðsmyndavélar hefðu náð upptöku af árásinni.

Þetta er önnur stunguárásin á skömmum tíma í sama hverfi. Þann 30. desember var 16 ára drengur handtekinn fyrir að stinga jafnaldra sinn til bana.

Lýsti Boris Johnson, forsætisráðherra Bretlands, því yfir að hann væri harmi sleginn vegna árásanna. Hann vottaði fjölskyldum og vinum fórnarlambanna virðingu sína og sagði að hugur sinn væri hjá þeim. Lögreglan myndi fá fullan stuðning til þess að stemma stigu við uppgangi slíkra hnífaárása.