Margir geyma matarafganga til að borða síðar enda er það eðlilegasti hlutur að borða matinn daginn eftir eða jafnvel síðar. Þetta er eitthvað sem við hugsum svo sem ekkert sérstaklega út í þegar við gerum það en það er ekki sama  hvernig við geymum afgangana.

Í umfjöllun The Independent kemur fram að oftast sé það ekki vandamál hvernig maturinn er matreiddur, heldur hvernig hann er geymdur.

Örverufræðingurinn Primrose Freestone sagði að sögn Allas að bakteríur geti þróast mjög hratt ef matur stendur lengi við stofuhita. Jafnvel þótt hann líti vel út, geti verið áhættusamt að borða hann.

Sumar matvörur þarfnast sérstakrar athygli eftir því sem segir í umfjöllun The Independent. Til dæmis þarf að setja pítsu í ísskáp í síðasta lagi tveimur klukkustundum eftir að hún er tilbúin, annars geta bakteríur byrjað að hreiðra um sig í henni.

Kjúklingur er auðvitað þekkt uppspretta matareitrunar og ef hann er ekki gegnumeldaður þá á alls ekki að borða hann. Ef hann er rétt eldaður þarf að setja hann fljótlega í ísskáp og borða innan nokkurra daga.

Hrísgrjón eru klassísk uppspretta matareitrunar. Bakteríur geta lifað suðu af og orðið virkar aftur ef grjónin eru ekki kæld hratt.

Geymsla matvæla er lykilatriði fyrir fæðuöryggið. Freestone benti á að það eigi aldrei að geyma matvæli í opnum niðursuðudósum. Það þarf að setja þau í lokuð ílát til að forðast að bakteríur berist í þau.

Ísskápur stöðvar bakteríurnar ekki alveg en hann hægir á þeim.