Daily Mail, sem vitnar í Tokyo Shimbun, segir að konan hafi nú höfðað mál á hendur manninum fyrir lygarnar. Hún varð mjög ósátt þegar hún komst að því að maðurinn er kínverskur en ekki japanskur og hafði ekki lokið námi frá Kyoto háskóla. Það bætti ekki úr skák að hann var kvæntur en ekki einhleypur eins og hann hafði sagt henni.
Konan og eiginmaður hennar komust í samband við manninn í gegnum samfélagsmiðla fyrir þremur árum eftir að þau höfðu ákveðið að eignast barn með aðstoð sæðisgjafa. Ástæðan er að eiginmaðurinn er með arfgengan sjúkdóm sem hann vildi ekki eiga á hættu að börn hans myndu einnig fá.
Konan og sæðisgjafinn, sem var á þrítugsaldri, stunduðu kynlíf tíu sinnum áður en konan varð barnshafandi í júní 2019. Nokkrum mánuðum síðar, þegar það var orðið of seint að fara í fóstureyðingu, uppgötvuðu hjónin að maðurinn hafði logið að þeim.
Þau gáfu barnið til ættleiðingar strax eftir fæðingu og hafa höfðað mál á hendur sæðisgjafanum hraðlygna og krefja hann um sem nemur um 300 milljónum íslenskra króna í bætur.