Í Illinois í Bandaríkjunum geta foreldrar skilið nýfædd börn sín eftir á sjúkrahúsum, lögreglustöðvum eða slökkvistöðvum án þess að eiga á hættu að verða sóttir til saka fyrir að láta börnin frá sér. Þetta byggir á svokölluðum „Baby Safe Haven“ lögum sem gilda í ríkinu.

Á laugardaginn fundu slökkviliðsmenn nýfæddan dreng utan við slökkvistöð í Chicago og var hann látinn. Þeir fundu hann um klukkan 5 að morgni. Drengurinn hafði verið skilinn eftir í poka við slökkvistöðina. Nístingskuldi var þessa nótt. Slökkvistöðin er meðal skilgreindra staða þar sem er hægt að skilja nýbura eftir.

Sky News hefur eftir talsmanni slökkviliðsins að slökkviliðsmennirnir hafi verið svo mikið á ferðinni þessa nótt að enginn hafi heyrt í dyrabjöllunni. Hann sagði að þrátt fyrir að það megi skilja nýbura eftir á slökkvistöðinni þá verði fólk að afhenda einhverjum barnið, það dugi ekki að hringja bara dyrabjöllunni og láta sig svo hverfa á brott.

Lögreglan rannsakar nú málið og segir ekki vitað hversu lengi drengurinn hafði verið fyrir utan slökkvistöðina áður en hann fannst eða hvort hann var á lífi þegar hann var skilinn eftir.