Dularfull árás átti sér stað á almennt friðsælli götu í úthverfi Canberra, höfuðborg Ástralíu, í gær. Einn lést og þrír slösuðust alvarlega. Daily Mail Australia greinir frá þessu.
Lögregla lokaði mörgum kimum götunnar vegna rannsóknar. Henni hafði höfðu borist tilkynningar um eitthvað grunsamlegt á laugardagsmorgun. Lögregluþjónar mættu um níuleytið á vettvang og fundu alvarlega slasaðan karlmann. Stuttu seinna réðst annar karlmaður að þeim, sem varð til þess að þeir beittu rafmagnsbyssu gagnvart honum og handtóku hann.
Síðan fundu lögregluþjónarnir lík karlmanns og alvarlega slasaða konu. Konan og mennirnir tveir voru flutt á spítala og fóru tvö þeirra beint í aðgerð sökum þess hve alvarlega þau voru slösuð.
Fram kemur að lögregla hafi ekki viljað tjá sig mikið um málið til að byrja með. Ekki hefur til að mynda verið greint frá því hvernig vopn hafi verið notuð í árásinni.
Þó hefur rannsóknarlögreglustjóri tjáð sig lítillega um málið. Hann sagði að rannsókn á málinu gæti tekið langan tíma. Hann fullyrti að almenningur væri ekki í hættu, þó ekki væri víst hvað hefði átt sér stað.
„Við erum enn þá að púsla þetta saman,“ sagði hann.
Þá hélt hann því fram að lögregla myndi leita að vísbendingum á vettvangi fram á nótt eða jafnvel fram til morguns.