Elísabetu Bretlandsdrottningu hefur verið gert að taka því rólega næstu daga og hvíla sig. Er drottningin sögð hafa tekið þessum ráðleggingum lækna „treglega.“ Drottningin fagnaði 95 ára afmælisdegi sínum í apríl síðastliðnum.
Óvanalegt er að drottningin blási af skipulagða viðburði vegna veikinda eða að öðru leyti að læknisráði, þrátt fyrir háan aldur. Í yfirlýsingu sem Buckingham höll sendi frá sér fyrr í dag er drottningin sögð hress en vonsvikin yfir að hafa þurft að blása af ferð sína til Norður Írlands. Ferðin verður vonandi farin síðar, segir höllin í tilkynningunni.
Sérstaklega var tekið fram í tilkynningunni að ekki væri um að ræða Covid tengd veikindi að ræða.
The Washington Post fjallaði fyrr í dag um málið og hafði eftir nafnlausum heimildarmanni innan hallarinnar að þátttaka drottningarinnar í COP26 loftslagsráðstefnunni í Glasgow í Skotlandi síðar í október, væri enn á dagskrá. Í síðustu viku náðist hljóðupptaka af drottningunni þar sem hún lýsti yfir óánægju með trega heimsleiðtoga til þess að boða mætingu sína á ráðstefnuna.
Í gær bauð drottningin viðskiptasendinefnd frá Bandaríkjunum í Buckingham höll. Á meðal viðstaddra voru Bill Gates stofnandi Microsoft og John F. Kerry fyrrverandi forsetaframbjóðandi og utanríkisráðherra Bandaríkjanna. Þá hitti drottningin fyrr í þessari viku sendiherra Japans og Evrópusambandsins. Í síðustu viku var drottningin á ferðalagi innanlands er hún skaust til Cardiff til að vera viðstödd setningu velska þingsins.
Drottningin fagnar 70 ára „platínum“ embættisafmæli á næsta ári.