Heimsfaraldur svínaflensu skall á heimsbyggðinni 2009. Talið er að allt frá 700 milljónum upp í 1,4 milljarða jarðarbúa hafi smitast af veirunni. 284.000 létust af hennar völdum. Þegar bóluefni var tilbúið var víða hafist handa við að bólusetja fólk gegn veirunni.
Það var bóluefnið Pandemrix sem var notað gegn veirunni en í fyrri rannsóknum hefur ekki verið hægt að útiloka tengsl á milli þess og einhverfu barna. En í nýju sænsku rannsókninni er kveðið upp úr með afgerandi hætti um að engin tengsl séu þar á milli. Það voru vísindamenn við Karólínsku stofnunina sem gerðu rannsóknina. Norska ríkisútvarpið skýrir frá þessu.
Vísindamennirnir fylgdust með 30.000 óbólusettum konum og 40.000 konum, sem voru bólusettar við svínaflensu veturinn 2009-2010, og börnum þeirra í sex ár. Eitt prósent barna bólusettu kvennanna höfðu verið greind með einhverfu eftir sex ár. Hjá óbólusettu konunum var hlutfallið 1,1 prósent.
Jonas F. Ludvigsson vann að rannsókninni ásamt fleirum. Í samtali við Forskning & Framsteg sagði hann að niðurstöðurnar geti lagt grunninn að þekkingu fyrir bóluefni framtíðarinnar, til dæmis í tengslum við þróun bóluefna gegn kórónuveirum.
