Mörg hundruð vopnaðir meðlimir glæpagengja hafa tekið þátt í óeirðum og uppþotum í Frakklandi að undanförnu. Komið hefur til harðra átaka og eldur hefur verið borinn að bílum og ruslagámum. Ramzan Kadyrov, forseti Tsjetsjeníu, styður meðlimi glæpagengja sem hafa tekið þátt í óeirðunum í borginni Dijon og verið vopnaðir sjálfvirkum skotvopnum.

The Guardian skýrir frá þessu. Óeirðirnar brutust út eftir að 16 ára drengur frá Tsjetsjeníu var drepinn af eiturlyfjasala þann 10. júní. Síðan þá hafa mörg hundruð manns tekið þátt í óeirðum í borginni. Kadyrov skrifaði á dulkóðaða samfélagsmiðilinn Telegram að frönsk yfirvöld hafi ekki ráðið við eiturlyfjasalana og því hafi unga kynslóðin tekið málin í eigin hendur.

Í stríðunum við Rússland á tíunda áratugnum létust að minnsta kosti 100.000 íbúar í Tsjetsjeníu og margir flúðu til Vestur-Evrópu. Þar settust þeir að í Belgíu, Austurríki, Þýskalandi og Frakklandi.

Kadyrov er nú forseti landsins en hann var stríðsherra í stríðinu við Rússa. Hann er sakaður um gróf mannréttindabrot og ofsóknir á hendur samkynhneigðum og pólitískum andstæðingum.

Franskir embættismenn segja að átökin í Dijon séu á milli Tjetjena og íbúa borgarinnar og að mörg hundruð Tjetenar hafi komið til borgarinnar til að taka þátt í átökunum. Kadyrov segir að atburðarásin að undanförnu sýni að „Tjetjenar standi saman gegn eiturlyfjasölum“ og að þeir hafi brugðist rétt við.