Faye var búsett í bænum Cayce í Suður-Karólínu en á mánudag skilaði hún sér ekki heim eftir að hafa tekið skólabílinn áleiðis heim til sín.
Lögregla staðfesti á blaðamannafundi í gær að lík Faye væri fundið. Lögregla varðist frekari frétta af málinu og tók lögreglustjórinn, Byron Snellgrove, ekki við spurningum frá blaðamönnum. Lík annars manns fannst á svipuðum slóðum ekki alls fyrir löngu, að sögn AP-fréttastofunnar, en lögregla hefur ekki viljað segja til um hvort málin tengist hugsanlega.
Rúmlega 250 lögregluþjónar tóku þátt í leitinni að stúlkunni sem var mjög umfangsmikil. Gengið var í nær öll hús í bænum og leitað hátt og lágt í nágrenni hans. Enginn hefur verið handtekinn vegna málsins en að sögn AP er lát stúlkunnar rannsakað sem morð.