Sendingarnar vekja töluverðar áhyggjur hjá Landbúnaðarstofnuninni. Jótlandspósturinn hefur eftir Kristine Riskær, deildarstjóra hjá stofnuninni, að sendingarnar komi yfirleitt frá Kína og ekkert komi fram um hver sendandinn sé. Talið sé að flestir pakkanna séu sendir óumbeðið. Líklega sé um ákveðna tegund svindls að ræða en þessi aðferð er vel þekkt víða um heim.
Í þessari aðferð felst að fyrirtæki, til dæmis netverslun, sendir vörur óumbeðið til fólks í þeirri von að viðtakendur gefi versluninni síðan góða umsögn á netinu.
Fræsendingar af þessu tagi hafa einnig streymt til Bandaríkjanna og Bretlands. Það er ekki svo augljóst af hverju fólk fær fræin send en hugsanlega kemst það á viðtakendaskrá eftir að hafa nýtt sér þjónustu ákveðinna sölusíðna.
Nú er unnið að rannsóknum á fræjunum og benda fyrstu niðurstöður til að um erfðabreytt fræ sé að ræða. Af þessum sökum er fólk beðið um að eyða innihaldinu ef það fær sendingar sem þessar.
