Rúmlega 2.000 COVID-19-sjúklingar liggja nú á sænskum sjúkrahúsum en rúmlega 7.000 manns hafa látist af völdum COVID-19 í landinu síðan faraldurinn skall á. Heimsóknabann er á stærsta sjúkrahúsi Stokkhólms, sem er næststærsta sjúkrahús landsins, Karolinska en innandyra berjast læknar, hjúkrunarfræðingar og ekki síst sjúklingarnir upp á líf og dauða. Björn Persson, yfirlæknir á gjörgæsludeild sjúkrahússins segir álagið vera gríðarlegt.

Norska ríkisútvarpið skýrir frá þessu. Haft er eftir yfirlækninum að nokkur rúm séu enn laus en það sé bara vegna þess að búið sé að tvöfalda fjölda legurýma frá því sem áður var. „Ég held að við höldum þetta kannski út í tvo mánuði til viðbótar. Þetta verður mjög erfitt en við verðum að hjálpa sjúklingunum. Það er ekkert val,“ er haft eftir honum.

„Það er mikið álag á starfsfólk gjörgæsludeilda núna. Við vorum með of fátt starfsfólk þegar þetta skall á. Það þýðir að hver og einn verður að sinna enn fleiri sjúklingum og það er mjög krefjandi. Allir vinna yfirvinnu og dagarnir eru mjög langir,“ sagði hann einnig.

Af þeim rúmlega 2.000 COVID-19-sjúklingum sem liggja nú á sænskum sjúkrahúsum eru um 250 á gjörgæsludeildum. Þetta eru of margir sjúklingar að sögn Björn sem segir að innlögnum verði að fækka: „Við höldum þetta ekki út lengi til viðbótar. Ég er hræddur um að gjaldið verði hátt til langs tíma litið. Ég óttast að starfsfólkið veikist, brenni út og hætti síðan störfum eða færi sig um set því það vill ekki lenda aftur í svona aðstæðum.“