Donald Trump, Bandaríkjaforseti, veitti fyrsta sjónvarpsviðtal sitt í dag eftir að hann tapaði forsetakosningunum á móti Joe Biden. Í viðtalinu sagði hann að sum ríki Bandaríkjanna hafi heimilað að atkvæðum væri skilað inn eftir kjördag og að talningarvélar hafi verið forritaðar til að veita Biden forgjöf. Hann hélt því jafnvel fram að alríkislögreglan (FBI), dómsmálaráðuneytið og dómstólakerfið væru meðsek í því að hylma yfir stórfelldum kosningasvikum. Viðtalið veitti hann fréttastofunni FOX.
„Þessar kosningar voru ákveðnar fyrirfram. Þessar kosningar voru algjör svik,“ sagði Trump sem hefur enn ekki viðurkennt ósigur.
Þáttastjórnandi, Maria Bartiromo, tók undir með Trump og sagði „Þetta er ógeðslegt og við megum ekki leyfa spillingu í Bandarískum kosningum“
Fjölmiðlar í Bandaríkjunum lýstu Biden sigurvegara fyrir nokkrum vikum siðan. Trump heldur því fram að mikið af þjóðarleiðtogum heimsins hafi haft samband við hann og sagt honum að þetta hafi verið „rugluðustu kosningar sem við höfum séð“. Biden hefur hins vegar gefið upp að nánast öll ríki sem eiga í góðum samskiptum við Bandaríkin hafi haft samband við hann og óskað honum til hamingju með sigurinn. Það á til dæmis við um Ísland þar sem forsætisráðherra og forseti Íslands hafa opinberlega sent velfarnaðaróskir til nýkjörins forseta.
„Við erum með sögur sem eru ótrúlegar, en við megum ekki leggja fram sannanir okkar. Okkur er sagt að ásakanir okkar séu tilhæfulausar. Ég sagði að lögmönnunum að ég vildi leggja fram eina stóra fallega kæru,“ sagði Trump sem er óánægður með það að kosningakærur hans hafa ekki hlotið brautargengi fyrir dómstólum þar ytra.
„Við erum með ótrúlega mikið af sönnunum. Við erum með vitnisburði, við erum með hundruð vitna sem eru tilbúin að sverja eiðstaf,“ sagði forsetinn.
Skilur hann ekki hvað dómstólar meina með tilhæfulausum ásökunum.
„Hvað meina þeir með tilhæfulaust, ég sem forseti Bandaríkjanna með tilhæfulausar ásakanir? Hvers konar dómskerfi er þetta?“
Þáttastjórnandi hjá Fox spurði forsetann hvar alríkislögreglan væri í þessu öllu saman, hvort að kosningasvik væru ekki nokkuð sem þeim bæri að rannsaka.
„Þeir eru horfnir. Get ekki sagt þér hvar þeir eru.“
Forsetinn gaf til kynna að hann sé ekki að fara að gefast upp í bráð.
„Ég mun ekki skipta um skoðun næstu sex mánuðina. Það var umfangsmikið svindl í þessum kosningum. Ef repúblikanar leyfa þessu að gerast þá munuð þið aldrei aftur fá repúblikana kosinn í sögu þessa lands, hvorki í öldunardeildina né í forsetaembættið“
Viðtalið hefur vakið nokkra athygli. Bæði The Independent og CNN hafa fjallað um það og taka fram að málflutningur forsetans hafi verið uppfyllur af rangfærslum og samsæriskenningum og það sé ljóst að Trump geti ekki horfst í augu við staðreyndina – að hann tapaði kosningunum.