Því er haldið fram í frétt á The Guardian að Rudy Giuliani, fyrrverandi borgarstjóri New York og núverandi lögfræðilegur ráðgjafi Donalds Trump Bandaríkjaforseta, gerist sekur um ósæmilega hegðun í nýrri mynd háðfuglsins Sacha Baron Cohen, um Kasakstan-búann Borat.
Guiliani er sagður fitla við sig undir buxunum fyrir framan konu sem hann áleit vera unga blaðakonu. Er borgarstjórinn fyrrverandi sagður ekki hafa vitað af því að verið væri að mynda hann. Giuliani er einnig sagður hafa sýnt mjög daðurslegt viðmót við konuna. Í rauninni er um að ræða leikkonu sem leikur dóttur Borats í myndinni, en í myndum Cohens er einatt blandað með þessum hætti saman skáldskap og veruleika.
Giuliani er 76 ára gamall og er mikilvægur hlekkur í kosningabaráttu Trumps. Hann er sagður hafa komist yfir tölvugögn sem sýni meint misferli mótframbjóðanda Trumps, Joe Biden.
Fulltrúar Giuliani hafa ekki svarað fyrirspurnum The Guardian um málið.
Ákveðin forsaga að málinu er sú að Giuliani hringdi á lögregluna í New York síðasta sumar, í byrjun júlí. Sagði hann að maður í furðufötum hefði ruðst inn á heimili sitt. Í viðtali við New York Post segist hann hafa gert sér grein fyrir því síðar að hinn óboðni gestur hefði verið Sach Baron Cohen. Cohen hefði flúið af vettvangi. Sagðist Giuliani vera feginn að hafa ekki látið háðfuglinn plata sig.
Ef upplýsingar Guardian eru réttar lítur þrátt fyrir allt út fyrir að Giuliani hafi verið plataður.
Myndin verður frumsýnd á föstudaginn.
