Nýlega neyddist Shinjiro Koizumi, 38 ára, umhverfisráðherra Japans til að svara erfiðum og oft á tíðum ásakandi spurningum fréttamanna. Ástæðan er að hann hafði tilkynnt að hann ætli að taka sér fæðingarorlof en hann er fyrsti karlkynsráðherrann í Japan til að gera það.

Hér á landi kippir enginn sér upp við að feður fari í fæðingarorlof enda sjálfsögð réttindi. En í Japan eru viðhorfin önnur og ákvörðun ráðherrans hefur vakið mikla athygli og skapað heitar umræður. Lítil hefð er fyrir að karlar taki sér fæðingarorlof þar í landi en aðeins sex prósent þeirra fara í fæðingarorlof.

Í umræðum um ákvörðun ráðherrans hafa sumir sagt hann vera nútímalegan og leggi sitt af mörkum til að breyta hinni hefðbundnu kynjaskiptingu í landinu. Aðrir hafa áhyggjur af að ákvörðun hans hafi áhrif á störf hans.

Af þessum sökum neyddist Koizumi til að verja ákvörðun sína þegar hann ræddi við fréttamenn. En það er ekki eins og hann ætli að vera frá störfum mánuðum saman því hann hefur í hyggju að taka sér 14 daga orlof. Til að reyna að slá á áhyggjur fólks hefur hann ákveðið að deila þessum 14 dögum niður á þrjá mánuði. Hann ætlar einnig að taka þátt í mikilvægum fundum og vera í reglulegu sambandi við samstarfsfólk sitt í ráðuneytinu og félaga í ríkisstjórninni.

„Það eru kostir og gallar við að taka fæðingarorlof. En það verða alltaf gagnrýnisraddir þegar einhver gerir eitthvað nýtt. Ég vona að í framtíðinni verði það ekki frétt ef einhver gerir það sama og ég.“

Sagði hann við fréttamenn.