Til stendur að senda Sutton í rafmagnsstólinn í kvöld nema ríkisstjóri Tennessee beiti sér og fresti aftökunni. Ólíklegt þykir að ríkisstjórinn stöðvi aftökuna.
En Sutton hefur fengið stuðning úr óvæntri átt, meðal annars frá aðstandendum Esteps og núverandi og fyrrverandi fangavörðum í fangelsinu í Tennessee, þar sem Sutton situr. Þeir segja að Sutton sé dæmi um algjöran fyrirmyndarfanga.
Þá segir dóttir Esteps að Sutton hafi gert fjölskyldu hennar greiða þegar hann myrti föður hennar. Estep sat inni fyrir nauðgun þegar hann var drepinn.
Í beiðni um miskunn kemur fram að æska Suttons hafi einkennst af ofbeldi, vanrækslu og síðar mikilli fíkniefnaneyslu. Sutton sé á allt öðrum stað í dag og algjör fyrirmyndarfangi.
„Ég get sagt í fullri hreinskilni að ég hef aldrei kynnst fanga sem hefur tekið jafn miklum breytingum og Nick Sutton,“ segir Tony Eden, fyrrverandi yfirfangavörður í fangelsinu.
Eden segist meira að segja telja að Sutton hafi eitt sinn bjargað lífi hans. Það var árið 1985 þegar fangar gerðu uppreisn í fangelsinu en Sutton hélt hlífiskildi yfir Eden og kom í veg fyrir að fangar næðu til hans.
Þá segir móðir annars fanga í fangelsinu, Paul House að nafni, að það sé Sutton að þakka að sonur hennar sé enn á lífi. House hafi glímt við MS-sjúkdóminn meðan á refsivistinni stóð en Sutton hugsað um hann óumbeðinn, baðað hann og aðstoðað hann við að næra sig.