Yfirvöld í Mólíse-héraði á austurströnd Ítalíu eru tilbúin að leggja mikið á sig til að fjölga íbúum í héraðinu. Þeir sem flytja í héraðið geta þannig átt von á því að fá 700 evrur á mánuði, eða tæpar hundrað þúsund krónur.
Íbúar í Mólíse eru um 305 þúsund en þar – líkt og víða annars staðar á Ítalíu – eru þorp sem mega muna fífil sinn fegurri. Til að fá þessa greiðslu þurfa nýir íbúar að koma sér fyrir í þorpi sem telur færri en tvö þúsund íbúa. Þá þurfa þeir að opna rekstur af einhverju tagi.
„Fólk getur opnað hvaða rekstur sem er; bakarí, ritfangaverslun, veitingahús – hvað sem er. Markmiðið er að blása lífi í bæina okkar og fjölga íbúum,“ segir Donato Toma, forseti Mólíse-héraðs, í samtali við breska blaðið Guardian. Hafa yfirvöld heitið því að greiða mánaðarlega 700 evrur í þrjú ár, samtals 25.200 evrur, eða 3,5 milljónir króna.
Yfirvöld í héraðinu hafa samhliða þessu ákveðið að styrkja fámenna bæi og þorp fjárhagslega í þeim tilgangi að bæta innviði og menningartengda starfsemi.
Samkvæmt ítölsku hagstofunni er Mólíse það hérað á Ítalíu þar sem hvað mest fólksfækkun hefur átt sér stað á undanförnum árum. Þannig hefur íbúum fækkað um 9.000 frá árinu 2014, þar af 2.800 árið 2018.