Bandaríski flugherinn varpaði í vikunni tæplega 40 tonnum af sprengjum á Qanus-eyju í Írak, skammt norður af höfuðborginni Bagdad. Aðgerðin var unnin í samvinnu við íraska herinn sem fór yfir svæðið eftir að sprengjum hafði rignt yfir eyjuna.
Markmiðið með sprengjuárásinni var að eyðileggja hugsanlega felustaði liðsmanna ISIS, en vitað er að þeir hafa haldið til á svæðinu að undanförnu. F-15 og F-35 orrustuþotur vörpuðu sprengjunum yfir eyjuna og birti Myles B. Caggins, ofursti og talsmaður aðgerðanna, myndband á Twitter-síðu sinni.
Mjög hefur þrengt að liðsmönnum ISIS í Írak og Sýrlandi á undanförnum árum og miða aðgerðirnar að því að þrengja enn frekar að samtökunum. ISIS náði stórum landsvæðum í Írak og Sýrlandi á sitt vald árið 2014 en síðasta vígi samtakanna, Baghouz í Sýrlandi, féll í mars á þessu ári.
Talið er að liðsmenn ISIS séu 30 þúsund og halda þeir að mestu til á einangruðum svæðum í Írak og Sýrlandi.