Tæknifyrirtækið Sony hefur tilkynnt að Playstation 5-leikjatölvan komi út fyrir jólin 2020. Óhætt er að segja að vélarinnar sé beðið með mikilli eftirvæntingu enda brátt liðin fimm ár síðan Playstation 4-leikjatölvan kom út.
Sony hefur ekki gefið ýkja mikið út um nýju tölvuna en það þarf þó vart að taka fram að búið er að uppfæra hugbúnaðinn umtalsvert. Vélin verður talsvert hraðari en forveri sinn og grafíkin betri.
Jim Ryan, stjórnarformaður Sony Interactive Entertainment, segir að fyrirtækið hafi lagt talsverða áherslu á að endurhugsa fjarstýringuna, DualShock, og virkni hennar.
Þetta mun líklega þýða að fjarstýringin mun spila stærra hlutverk í leikjaspiluninni en áður. Sjálfur segir Jim að tilgangurinn sé að bæta upplifun notenda af fjarstýringunni. Í Playstation 4-leikjatölvununum var innbyggður titrari í fjarstýringunni og hann verður áfram til staðar en með annarri og betri tækni.
Þannig verður hristingurinn gjörólíkur eftir því hvað þú ert að gera. „Að klessa á vegg í kappakstursleik verður allt öðruvísi en að framkvæma tæklingu í fótboltaleik,“ segir hann.
Þá mun leikjatölvan styðja það sem kallað er ray-tracing, en það er stafræn tækni sem mun bæta grafíkina til muna. Með henni munu leikjaframleiðendur geta þróað leiki með raunverulegri ljósgeislum, skuggum og speglunum en áður.
Talið er að Sony hafi sótt um einkaleyfi fyrir hönnun vélarinnar fyrr á þessu ári, en í umsókninni var þó ekki tekið fram hvort um væri að ræða Playstation 5-leikjatölvuna. Margt þykir þó benda til þess en myndina af vélinni má sjá hér efsti í fréttinni.