Þetta kemur fram í grein eftir hann sem var birt í Scientific American. Levin stýrði Viking verkefni NASA 1976 en þá voru tvö Viking geimför send til Rauðu plánetunnar til að gera ýmsar tilraunir og taka myndir. Þetta var í fyrsta sinn sem NASA lenti geimförum á Mars og fékk myndir frá þeim.
Levin stýrði tilraun sem gerð var með öðru lendingarfaranna. Það tók jarðvegssýni og blandaði köfnunarefnisblöndu, sem innihélt einstaka geislavirka kolefnisblöndu. Kenningin sem unnið var út frá var að ef örverur væru í jarðveginum myndu þær melta blönduna og losa geislavirka kolefnið. Levin segir að niðurstöðurnar hafi verið jákvæðar og sýnt að örverur væru til staðar og að sama niðurstaða hafi fengist úr rannsókn hins könnunarfarsins sem var í um 6.000 kílómetra fjarlægð. Hann segir að mörg þúsund aðrar rannsóknir, framkvæmdar hér á jörðinni, styðji þessar niðurstöður.
En þrátt fyrir þetta hefur NASA haldið því fram að engin ummerki um örverur hafi fundist í jarðvegi nærri lendingarstöðum Viking geimfaranna. Levin segir að það styðji orð hans að eftir ferðir Viking geimfaranna hafi NASA staðfest að vatn, metan og fleira sé að finna á Mars. Hann segir einnig að á myndum teknum af Curiostiy Marsbíl NASA megi sjá „eitthvað sem líkist ormum“.
Levin telur að NASA dragi lappirnar í þessum málum og segir að stofnuninni hafi mistekist allt frá 1976 að gera markvissa leit að lífi á Mars þrátt fyrir að slík leit sé sögð vera meðal helstu markmiða stofnunarinnar.