Það ætlaði allt um koll að keyra í mexíkósku borginni Culiacan í gær þegar það spurðist út að einn af sonum Joaquin „El Chapo“ Guzman hefði verið handtekinn. Sonurinn, Ovidio Guzman, er hátt settur í Sinaloa-glæpasamtökunum og er hann eftirlýstur af bandarískum yfirvöldum.
Ovidio var handtekinn í Culiacan í gær, í raun fyrir tilviljun, og fluttur í fangaklefa en óhætt er að segja að félagar Ovidio hafi gengið af göflunum þegar fregnir af handtökunni spurðist út. Hópur á vegum samtakanna mætti þungvopnaður á svæðið og hóf skothríð með það að marki að frelsa leiðtoga sinn.
Mexíkóskar öryggissveitir reyndu að bregðast við þessu og brutust út skotbardagar víða í borginni. Þá kveiktu undirmenn Ovidio elda víðsvegar um borgina og er óhætt að segja að hálfgerð ringulreið hafi ríkt um tíma. Svo fór að yfirvöld ákváðu að sleppa Ovidio úr haldi til að tryggja öryggi liðsmanna öryggisveitanna og til að tryggja öryggi almennings.
Svipmyndir frá Culiacan má sjá í myndbandinu hér að neðan: